Karma

I däm Post verzeu ig dir chli vom Karma. Viu kenne de Begriff, wüsse aber nid was würklich aues drhinter steckt. Sit dere Zit woni mi mitem Buddhismus usenander setze, hani eigentlich ersch realisiert was für e grosse Ifluss z’Karma uf üses alltägliche Lebe het. Gern würdi das Wisse ize o mit dir teile.

Im Buddhismus gits vier edli Wahrheite:

  1. Es git Leid.
  2. Es git grundlegendi Ursache für das Leid.
  3. Das Leid cha beendet werde.
  4. Es git e guete Weg, das Leid z’beende.

Karma het uf di 2ti Wahrheit Ifluss. I dere Wahrheit wird d’Ursache für z’Leid im eigete Geist gfunde. Ohni dass mirs bewusst wahrnähme, reagieremer uf alli Idrück mit Bewertige wi guet/schlecht, agnähm/unangnähm und hägle das entweder mit Anhaftig (Gier) oder Ablehnig(Ärger) ab. Das cha grossi Spannige im Geist ufrüefe.

We mir auso Anhaftig u Ablehnig empfinde u dür das Hoffnig u Furcht, beeiflusst das üsi Handlige. Wie es berühmts Sprichwort seit: Us de Gfüehl entstöh Gedanke, us de Gedanke entstöh Wörter und us de Wörter entstöh konkreti Tate. Aues – jedes Wort, jede Gedanke, jedi Tat – hinterlaht öpis i üsem Geist, was Uswürkige het wimer di Weut erlebe. Und genau dise Idruck im Geist wird Karma gnennt.

Es chunt drufa i welere Absicht e Handlig gmacht isch worde und nach dem entsteit ner o e heilsami oder e unheilsami Prägig im Geist. Und die Prägige si ner speter d’Ursache für witteri Handlige.

Wi e Handlig wirkt isch abhängig vo üseri Motivation wo hinger de Handlig steckt. So passierts no hüfig, dass mer e Person unabsichtlich miteme blöde Scherz verletze. Ma het villech are Person wehtah aber wenn mirs ner ufrichtig bedure und es würklich nid Absicht gsi isch, si z chränke, wird das ke Uswirkig ha uf üses Karma-Konto. Anderschs isches ner natürlich wemer richtig hässig si u me mit voller Absicht öper verbal verletzt.  De bringt o z'”i has ni so gmeint” nüd meh. O weme villech sogar chli Freud het nach dere Tat, kippt das irgendwenn u ner füehle mir üs schlechter.

Es paar vo de unheilsame Handlige hei unmittelbar drnah spürbari Uswürkige. Bi andere Handlige schints so, aus würde si ohni Folge blibe. Aber d Wahrheit isch, dasses eifach es biz lenger duret, bis es so wit isch. Es guets Bispiu isch z Fremdgah. Vieli denke, dasses ke Uswirkige het, solang dasses de Partner ni erfahrt. Ufe erst Blick cha das o stimme. Aber e Fremdgeher seuber gloubt ner a Misstroue, da er genau öpis macht wo bewist, dass Mistroue berechtigt isch. U da Mönsche vo sich seuber uf anderi Lüt schliesse, bechunt de Fremdgeher baud de Verdacht, dass si Partner ihn o chönt hintergah. D’Angst dass aues mau ufflügt chunt no drzue. U ner müesst er ono ufpasse, dass er sich nid verratet. Zudem schleppt er ner geng es schlechts Gwüsse mit ihm ume u das füehrt drzue, dass er sich vom Partner wird entfremde, bis di Bezihig schliesslich a deri Lüg id Brüch geit. All das Lide wo drbi entsteit, führt wieder zu negative Prägige im Geist und ine endlosi Verstrickig vo karmische Prägige u Uswürkige. Me muess auso ufpasse, dass me de Tüfelskreis nie betritt.

Faus du es no ni machsch – wasi aber denke – hoffi, dass o du i Zuekunft bewusster umgeisch mit dine Worte und Tate – immer mitem Wüsse, dass es Uswürkige het uf dis ganze Lebe wo no fougt. Und uf z’Lebe vo anderne! 🙂 We’re all one! ❤

 

 

 

 

Blind to the obvious

Kensch das Gfüehl, we du öpis lehrsch und uf z’mau denksch “Wiso hani je denkt dasses anders isch?”. I beziehs ize nid uf irgend e (längwiligi) Mathufgab sondern über Grundlegendes wome (eigentlich) ir Schueu nid lehrt. D Red isch vore Vertiefsarbeit woni ha gmacht füre Abschluss vom ABU Unterricht. Es het sich drbi ume Partnerarbeit ghandelt u mir heis letst Donsti mitere Präsentation abgschlosse. Wasmer aber währendem Usarbeite vo dere Arbeit glehrt hei, werdemer (oder emu sicher ig) nie vergässse.

Mir hei z’ Thema Sehbehinderige gno. E Mönsch gilt us sehbehinderet, wener e Visus het wo 0.3 oder chliner isch. Und das mit Korrektur i Form vore Brille oder Kontaktlinse. Das bedütet, we ig (agnomme i gseh perfekt) öpis vore Entfernig vo 100m cha erkenne, erkennts die Person miteme Visus vo 0.3 ersch ab 30m Entfernig. Abeme Visus vo 0.02 giut e Person us blind.

Iz fragsch di villech, werum mi das Thema so interessiert het, dassi sogar e Arbeit drüber ha  gschribe. De Grund isch, dassi i mim Freiwilligeisatz in Vietnam öpis gseh ha womer extrem igfahre isch. Nebe de Chinder hets o blindi, erwachseni Mönsche i dem Waisehus gha. Und die hei ihre ganz Tag sitzend ufeme Bänkli verbracht, wüu si schüsch nüd gha hei wo si hei chöne mache. Ihri einzigi Beschäftigung isch gsi, dass si am Namittag mängisch anderi Lüt hei chöne massiere. I weiss, dass die Blinde i dem Waisehus si, wüu sie vo de eigete Familie verstosse si worde. I het gern mit dene sehbehinderte Lüt gredt und mit ihne Zit verbracht, leider het d’Sprachbarriere mir da e Strich durch d’ Rächnig gmacht.

I ha mit de Vertiefigsarbeit weue usefinde, was es ir Schwiz für Möglichkeite git für die blindi/sehbehinderte Persone.

1049911_orig.jpg
Ky Quang Pagoda Orphanage Ho Chi Minh City, Vietnam
Und ner heimer afa recherchiere. Agfange het aues bire Lehrerin are Blindeschuel. Vo ihre wüssemer, dass die blinde Chinder ir Schueu je einisch ir Wuche O&M Training hei. O&M steit für Orientierig & Mobilität. Die Lehrerin geit auso denn immer mit ihrne Schüeler i di “öffentlichi Welt”. D’Chinder lehre so selbständig z’reise. Zum Bispiu lehre sie düre Bahnhof z loufe währendem sie sich nur mit ihrem Ghör (z.B. o mit Echolokalisatione) orientiere. D’Schüeler merke bim Loufe dür d’Bahnhofunterfüehrige o, bi welem Gleis sie grat si. Sie merkes o usem Grund, dass es bi de Gleis jeweils e chline Luftstoss git wo si uf de Hut gspüre (Weri das dir jemaus ufgfaue?).  Ig seuber hanimi scho geng gfragt, woher di blinde Persone wüsse, wo sie sich grat befinde u wie dass sie geng d’Markierige finde. Iz weissis – sie lehres bereits ir Blindeschuel.

Ner heimer e sehbehinderte Schüeler kenneglehrt. Er isch de wo mir würklich “d’ouge göffnet” het. Er het üs verzeut, dass er früecher ir normale Regelschuel oft ghänslet isch worde wege ihmse Sehbehinderig. Er het haut eifach nüd chöne vorlese oder vor Tafele  erkennt gha. Das isch anschinend scho Grund gnue für öper z’mobbe.. De Schüeler het üs aber öpis glehrt, wome ir Schuel seuber nie lehrt – obwous doch so wichtig wär. Er het üs zeigt, dass es sooo bedütigsvoll isch, sich seuber zu akzeptiere/liebe. Wüu o sini Sehbehinderig isch öpis wo genau si Charakter usmacht. Ohni sini Sehbehinderig würdener ni so stark u seubstbewusst ufträte winers ize macht. Die Ussag vo ihm het mi sehr beidruckt.

Ner heimer e Studentin troffe. Sie isch blind u het e Nebejob im (Dunku)Restaurant blindeKuh. Sie het üs bewisse, dassme o us blindi Person mit beidne Bei voll und ganz im Lebe cha stah. Sie cha ihrem Troum nachegah u das Studiere wosi scho geng het weue.

Zum Schluss heimer wider e Lehrer vo de Blindeschuel troffe. Er isch seuber blind. Es isch ame Sprengunfau ir RS passiert woner 20 jährig isch gsi. Woni das ghört ha, bini soo gschockt gsi. Eigentlich heti er z’Bougschäft vo ihmse Vater seue übernäh.. das isch aber ner undenkbar gsi. Stattdesse heter z’Lehrerseminar gmacht u d’Jazzschule absolviert. Er verbreitet ize mit ihmse Musik – winer seuber seit – wortlosi Gschichte. Er isch so fröhlich u ufgsteut gsi, vo dem chönte mir üs aui e Schibe abschnide.

Aui di verschidene Persönlichkeite – woni ha dörfe kennelerne – hei ei Wunsch:

Sie aui möchte d’Gseuschaft für z’Thema Sehbehinderige sensibilisiere. D’Lüt seue sich bewusst si, dass hinder de sehbehinderte Mönsche genau so spannendi Persönlichkeite stecke und sie nid nur uf die Sehbehinderig reduziere. Und genau das ischmer bewusst worde. Ob mit oder ohni Ougeliecht: Jede Mönsch isch genau glich. Mit Wünsch, Hoffnige u Sehnsücht. Und hinder jedem sehbehinderte Mönsch stecke viel spannendi Gschichte. Ir Schwiz hei si – im Gegesatz zu Vietnam – o z’Glück ihri Tröim chöne uszlebe.

 

 

Thanks 2016!

Trotz oder villich sogar wege de ville negative Schlagzile im 2016, zeigi hie Fotos vo mine persönliche Highlights a Erlebnis im 2016:

img_3036
Ky Quang Pagoda Waisenhaus in Ho Chi Minh City, Vietnam
mekongdelta2.jpg
Mekong Delta River in Vietnam
treeplanting.jpg
Tree planting in Abai Village, Borneo (Malaysia)
barbeque.jpg
Sunset BBQ in Kudat, Borneo (Malaysia)
beachlavadores.jpg
Praia Lavadores in Vila Nova de Gaia, Portugal
catcostah
Graffiti in Porto, Portugal
lyoncropped.jpg
Blick aus dem Hotelzimmer in Lyon, Frankreich
 

..Natürlich gits no viu meh gueti Sache woni im 2016 ha dörfe erlebe 🙂 Und iz luegi füre i z’Jahr 2017 und wünsche mir, dass o i dem Jahr ganz viu wunderschöni Erlebnis uf mi warte.

 

Cook it, peel it – or leave it

Esse isch nid z wichtigste. Es dreit sich nid aues um z esse, stimmt. Wes eim aber nüme guet geit, dreit sich plötzlich aus nur no um das. Damit das ni passiert us dim Büchli über d’Ferie guet geit, empfihli sehr de chli Heufer “Bioflorin”. Das chasch scho vor de Ferie neh, dass di Körper weiss, dass öpis uf ihn zuechunt. 😛 Und natürlich weisch scho, dass du getrost uf d’ Iiswürfeli i de Getränk chasch verzichte. De Grund defür isch, dass i viune Länder z’Leitigswasser mit etliche Erreger u Bakterie verunreinigt isch. Es paar Gastrobetrieb mache aber genau mit dem Leitigswasser z’Iis. Am beste verzichtetme auso ufd Iiswürfle. Wi mir womer z’Vietnam bi gfüllte 40 Grad am Mittag imne Kaffi ame warme Cola gschlürft hei. *isch am feinste so*

Da gids aber Usnahme. Sisi d’Iiswürfeli ründlich u hei es Loch ir Mitti, isch d Wahrschinlichkeit hoch, dass sie guet produziert si worde u so dim Körper nid schade. Das isch meistens bi offiziele Shops u schöne Restaurants dr Fau. Schüsch chame immer sege “no ice please”. 🙂 Natürlich isch o z beachte, dass das so bekannte Streetfood nid di besti Idee isch für üsers “schwizer-esse-gwohnts” Mägeli. 😛 Augemein muessme eifach abschetze, was z’beste für eim isch. Uf gwüssi sache wie z’ “not instant” Kaffi ufem Foto heimer getrost chöne verzichte. 🙂

coffeestrainer
Frühstück im Dschungel (Malaysia)

Wüu mir di Sache beachtet hei, isches üs zum Glück di ganze Ferie guet gange. 🙂

Das seu aber iz ni irgendwie e Schocker für das Esse z’Vietnam oder z’ Malaysia si. Wüu das Esse womer gha hei, isch extrem guet gsi. Hie zrug ir Schwiz, vermissi das Esse. Mmmh zum Bispiu di feini, vietnamesischi Nudusuppe Pho.  Am meiste vermissi aber z’Iiskaffi Sue Da vo Vietnam. Natürlich hani ebe iz das nur mit de runde, durchlöcherte Isswürfeli trunke 😉 A dem Kaffii isch speziell, dasses mit Kondensmiuch gmacht isch u nid mit de normale Miuch. Das isch sooooo fein *-* Hie no d’Bewisfotos, dass z asiatische Esse eifach z’beste isch:

pagoda food.jpg
Mittagessen im Waisenhaus in Ho Chi Minh City, Vietnam
fein1.jpg
Mittagessen in der Stadt – Ho Chi Minh City, Vietnam
pho
Nudelsuppe Pho mit Chicken in Ho Chi Minh City, Vietnam
cafesuda
IceCoffee Sue Da in Ho Chi Minh City, Vietnam